Vi tilrår at du alltid nyttar siste versjon av nettlesaren din.

Sarkomsenteret

Sarkom er kreftsvulstar som oppstår i bein- eller blautvev (det vil seie bindevev, feittvev, musklar, sener og lignande). Førekomst av sarkom er sjeldan (mindre enn ein prosent av alle nye krefttilfelle). Nødvendig utgreiing og behandling blir utført av ei fleirfagleg spesialistgruppe i regi av Senter for bein- og blautvevssvulstar ved Haukeland universitetssjukehus. Sarkomsenteret ved Haukeland gir tilbod til pasientar med sarkomsvulstar frå heile landet, og har, saman med Radiumhospitalet, nasjonalt ansvar for kirurgi av beinsarkom. Både Kreftavdelinga og Ortopedisk avdeling deltar i drifta av senteret. Fleirregional behandlingsteneste for kirurgi ved beinsarkom er ein del av Sarkomsenteret.

Fleirregional behandlingsteneste for kirurgi ved beinsarkom

Den fleirregionale behandlingstenesta omfattar kirurgisk behandling av beinsarkom, diagnostikk og utgreiing av beinsarkom innanfor patologi, radiologi, onkologi og kirurgi, og nødvendig oppfølging av pasientar med komplekse skjelettrekonstruksjonar.

Kirurgi for beinsarkom inneber ofte fjerning av større delar av knoklar eller ledd, ofte med tilgrensande muskulatur og andre strukturar. Dei fleste pasientane kan unngå amputasjon. Korrekt primær kirurgisk behandling av beinsarkom har mykje å seie for både overleving og funksjon hos desse pasientane. Utgreiing og kirurgisk behandling av beinsarkom krev tverrfagleg høgspesialisert kompetanse. Det er få nye tilfelle årleg.

For å sikre god kvalitet, er tenesta sentralisert til éi fleirregional behandlingsteneste lokalisert ved Haukeland universitetssjukehus, Helse Bergen HF og Radiumhospitalet, Oslo universitetssjukehus.

ICD10 koder: C40, C41 Ondartede svulster i knokler og leddbrusk  

Sarkomsenteret ved Haukeland Universitetssjukehus

Sarkomsenteret består av eit tverrfagleg team av spesialiserte onkologar (kreftlegar), ortopedar, radiologar, patologar, kirurgar frå ulike spesialfelt, barneonkologar, spesialsjukepleiarar, fysioterapeutar og koordinator.

Alle tilvisingar der det blir stilt spørsmål om sarkom blir dagleg vurderte av lege tilknytt Sarkomsenteret. Tre dagar kvar veke har vi faste møte der vi går gjennom tilgjengeleg diagnostikk (radiologi, biopsisvar med meir). Aktuelle spesialistar og koordinator er til stades på desse møta. På desse fleirdisiplinære møta blir det skissert ein plan for vidare utgreiing og behandling.

I tilfelle der det ikkje er nødvendig å iverksetje tiltak ved vårt sarkomsenter (mottatte røntgenbilde til konsultasjon), sender vi skriftleg råd til tilvisande lege. Ved hastetilvisingar organiserer koordinator ad hoc-møte mellom aktuelle legar.  

Gruppebilde av tilsette rundt bord på møterom. Foto

Kven skal tilvisast og kva skal tilvisinga innehalde?

Elektroniske tilvisingar til Sarkomsenteret ved Haukeland Universitetssjukehus (HUS)

  • Blir sendt til tenesteadresse ortopedisk avdeling, HUS
  • Merk tilvisinga med sarkom
  • Viss svulst ikkje er i ekstremitetar, brystvegg, rygg, hovud-/hals skal tilvising sendast:
    • Gastrokirurgisk avdeling ved restroperitoneale svulstar eller mistanke om intraabdominalt sarkom /GIST
    • Kreftklinikken ved mistanke om tilbakefall av tidlegare onkologisk behandla  sarkomsjukdom
    • Gynekologisk avdeling ved mistanke om sarkom i kvinnelege genitalia.

Einingsleiar/koordinator:

Kontornummer 3856, 2. etg. Sentralblokka

Telefon: 55 97 28 22

Årsrapport Flerregional behandlingsteneste for kirurgi ved beinsarkom

Sjå punkt om formidling i årsrapport 

Sjå årsrapport frå Kreftregisteret

Sarkomsenteret ved Haukeland universitetssjukehus samarbeider tett med Skandinavisk Sarkomgruppe (SSG). SSG blei etablert i 1979 og vår målsetting er å bidra til forsking, samt harmonisere behandlinga av sarkom i dei skandinaviske landa.
Sidan 1986 har SSG samla inn data om sarkompasientar til eit skandinavisk kvalitetsregister som dannar grunnlag for både forsking og kvalitetssikring av behandlinga. Vidare samarbeider Sarkomsenteret med europeiske og nord-amerikanske sarkomorganisasjonar, både gjennom deltaking i kliniske studiar og ved kompetanseutvikling i form av internasjonale kurs og møte.

Sarkomsenteret ved Haukeland universitetssjukehus deltar i nasjonale, skandinaviske og internasjonale protokollar som omfattar både basalforsking, kliniske utprøvingsstudiar og etablerte behandlingsprogram.

Pasientar som blir behandla ved Sarkomsenteret kan derfor bli spurde om å delta i forsking på frivillig basis. Dei fleste behandlingsprotokollar som sarkomsenteret følgjer, er baserte på eit breitt internasjonalt samarbeid mellom ulike sarkomorganisasjonar i vestlege land. For behandling av barn med sarkom gjeld særskilte studiar og retningslinjer.

Aktuelle behandlingsprotokollar/studiar ved sarkom er:

Blautvevssarkom

Neo-STS (Sequential neoadjuvant ifosfamide and doxorubicin in localized high-grade soft tissue sarcoma of extremities and trunk wall)

SSG XX (Adjuvant kjemoterapi og akselerert strålebehandling ved høgrisiko blautvevssarkom i ekstremitetar og kroppsvegg)

SSG XVII (Anbefalingar for diagnose og behandling av intraabdominale, retroperitoneale og uterine sarkom)

SSG XIX (Anbefalingar for behandling av metastatisk blautvevssarkom hos vaksne).

EpSSG RMS (Behandling av ikkje-metastatisk rhabdomyosarkom hos barn)

EpSSG RMS-MET (Behandling av metastatisk rhabdomyosarkom hos barn)

EpSSG NRSTS (Behandling av non-rhabdo blautvevssarkom hos barn)

Beinsarkom

Euramos 1 (Behandlingsprotokoll for resektable osteosarkom)

Euroboss (Optimalisering av behandling av beinsarkom hos pasientar over 40 år)

rEECur Internasjonal randomisert kontrollert studie ved kjemoterapi ved tilbakefall eller primær behandlingssvikt ved Ewings sarkom.

Internasjonalt samarbeid

Sarkomsenteret ved Haukeland universitetssjukehus deltar i internasjonale studiar/behandlingsprotokollar (sjå over), og samarbeider tett med internasjonale sarkomorganisasjonar som EMSOS,  CTOS, EORTC, ISOLS gjennom forsking, kurs og møte.

Nasjonalt kompetansesenter for sarkomer 

Kreftforeningen

Skandinavisk sarkomgruppe SSG

Sarkomforeningen 

Kontakt

Telefon

Telefonnummer til koordinator ved Sarkomsenteret, besvares ukedager mellom kl. 08.00 – 15.30

Postadresse

Haukeland universitetssjukehus
Sarkomsenteret v/Ortopedisk avdeling
Postboks 1400
5021 Bergen

E-post

postmottak@helse-bergen.no

Slik finn du fram

Oppmøtestad

Koordinatorkontor:
Sentralblokka, 2.etasje
Romnummer 3856